Chapter A54
ap54.1atha bhagavān śākyamuniḥ punar api śuddhāvāsabhavanam avalokya mañjuśriyaṃ kumarabhūtam āmantrayate sma || 54.1 ||
ap54.2ayaṃ mañjuśrīḥ • dharmaparyāyaḥ • asmin sthāne pracariṣyati tatrāhaṃ svayam evaṃ veditavyaḥ | sarvabodhisattvagaṇaparivṛtaḥ śrāvakasaṅghapuraskṛtaḥ sarvadevanāgayakṣagaruḍagandharvakinnaramahoragasiddhavidyādharamānuṣāmānuṣaiḥ parivṛto vihare 'haṃ veditavyaḥ | tathāgato 'tra rakṣāvaraṇaguptaye tiṣṭhatīti || 54.2 ||
ap54.3daśānuśaṃsā mañjuśrīḥ kumāra veditavyāḥ • yatra sthāne 'yaṃ dharmakośas tathāgatānāṃ pustakagato vā lekhayiṣyati vācayiṣyati dhārayiṣyati satkṛtya manasikṛtya vividhaiś cāmaracūrṇacchatradhvajapatākāghaṇṭābhir vādyamālyavilepanair dhūpagandhaiś ca sugandhibhiḥ pūjayiṣyati mānayiṣyati satkariṣyaty ekāgramanaso vā cittaṃ dhatse | katame daśa || 54.3 ||
ap54.4na cāsya paracakrabhayaṃ durbhikṣo vā | na cāsya tatra mahāmāryopadravaṃ bhavati • amānuṣabhayo vā | na cāsyāgnibhayaṃ bhavati sarvapratyarthikabhayo vā | na cāsya tatrānāvṛṣṭibhayaṃ bhavati • ativṛṣṭibhayo vā | na cāsya tatra mahāvātamaṇḍalībhayaṃ bhavati sarvakravyādabhayo vā | na cāsya śakrabhayaṃ bhavati sarvadhūrtataskarabhayo vā | na cāsya mṛtyubhayaṃ bhavati yamarājopanītabhayaṃ vā | na cāsyāsurabhayaṃ vā bhavati sarvadevanāgayakṣagandharvāsurabhayo vā | na cāsya mantrabhayaṃ bhavati sarvagaraviṣabhayaṃ vā | na cāsya rogabhayaṃ bhavati jvarātīsārajīrṇāṅgapratyaṅgabhayo vā | ime daśānuśaṃsā veditavyā yatrāyaṃ mahākalpavisare dharmakośas tathāgatānāṃ pustakagato tiṣṭheta | likhanavācanapūjanadhāraṇasvādhyāyānāṃ vā kurmaḥ || 54.4 ||
ap54.5guhyatamo 'yaṃ dharmakośas tathāgatānāṃ mantrānuvartanatayā punar eṣāṃ sarvataḥ | ācāryasamayānupraviṣṭānām asamayajñānāṃ na prakāśitavyaḥ | yat kāraṇam | rahasyam etat | guhyavacanam etat | sarvajñavacanam etat | mā haiva sattvā pratikṣepsyante • avajñasyanti || 54.5 ||
ap54.6na pūjayiṣyanti na satkariṣyanti mahad apuṇyaṃ prasaviṣyante | guhyanivaraṇasattvopaghātananṛpatisūcana•āyuḥpramāṇopaghātopasargikakriyāṃ kariṣyantīti na pareṣām {S658} ārocayitavyaṃ ca | samayarahasyaguhyamantracaryānupraviṣṭānāṃ sattvānāṃ tathāgataśāsanaśikṣāyāṃ suśikṣitānāṃ suvyavasthitānāṃ dharmārthakovidām āyatanadhātusamayānupraveśadharmasthitānāṃ satyasandhānāṃ dṛḍhavratam anvāgatānāṃ sattvacaryāmārgānupraviṣṭakāruṇikānām eteṣāṃ sattvānām ārocayitavyam na pareṣām | iti || 54.6 ||
ap54.7atha khalu mañjuśrīḥ kumarabhūto bodhisattvotthāyāsanād ekāṃśam uttarāsaṅgaṃ kṛtvā dakṣiṇaṃ jānumaṇḍalaṃ pṛthivyāṃ pratiṣṭhāpya kṛtakaratalāñjalipuṭo bhagavantam etad avocat | ko nāmāyaṃ bhagavan dharmaparyāyaḥ | kathaṃ cainaṃ dhārayāmy aham | bhagavān āha || 54.7 ||
ap54.8sarvabodhisattvavisphūrjanabodhisattvapiṭaka ity api dhāraya | āścaryādbhutadharmopadeśaparivarta ity api dhāraya | sarvamantrakośacaryānupraviṣṭabodhisattvanirdeśa ity api dhāraya | mahāyānavaipulyanirdeśādbhuta ity api dhāraya |
āryamañjuśriyamūlakalpa ity api dhāraya |
sarvadharmārthapūraṇanirdeśa ity api dhāraya | iti || 54.8 ||
sarvalokān samagrān vai dharmādharmavicārakān |viceruḥ sarvato yas tvaṃ bodhisattvo maharddhikaḥ || 54.9 || {V516}na paśyase paraṃ guhyam etaṃ dharmavaraṃ varam |mantratantrārthasūtrāṇāṃ gatideśaniratyayam || 54.10 ||na paśyase varaṃ vīra dharmaṃ bodhiparāyaṇam |yādṛśo 'yaṃ guhyasūtraṃ .......... neyārthabhūṣitam || 54.11 ||vividhākārasūtrārthāḥ • mantratantrānuvartanam |na bhūtaṃ vidyate kaścid yaḥ kalpavisarād iha || 54.12 ||mahārājñāṃ mahābhogāṃ sampadāṃś ca divaukasām |prāpnuyāt puṣkalāṃ kīrtiṃ divyāṃ mānuṣikāṃ tathā || 54.13 ||akṣāṇāṃ varjayed aṣṭāṃ kṣaṇāṃś caiva sambhāvayet |buddhatvaṃ niyataṃ tasya tridhā janagatis tathā || 54.14 ||idaṃ sūtraṃ dhāraṇāt puṇyam anuśaṃsā syād ime tathā |na cāsya sarvakāye vai na viṣaṃ na hutāśanam || 54.15 || {S659}na vetāḍā grahāś caiva na pūtanā mātarā hi ye |tena corarākṣasā ........... || 54.16 ||piśācā vāsya hiṃsyeyur yas ta sūtram imaṃ paṭhet |dhārayed vāpi pūjayed vā punaḥ punaḥ vividhā || 54.17 ||vādyapūjyapūja-iṣu pūjayed vā viśaradaḥ |sa imāṃ labhate martyo-m-anuśaṃsām ihoditā || 54.18 ||āturo mucyate rogān duḥkhito sukhino bhavet |daridro labhate arthān baddho mucyeta bandhanāt || 54.19 ||patitaḥ saṃsāraduḥkhe 'smin gatiṃ pañcakayojitam |kṣemaṃ śivaṃ ca nirvāṇaṃ prāpnuyād acalaṃ padam || 54.20 ||pratyekabodhibuddhatvaṃ śrāvakatvaṃ ca naiṣṭhikam |idaṃ sūtraṃ vācayitvā labhate buddhavartitām || 54.21 ||gaṅgāsitatāprakhyānām anantyaṃ jinavarās tathā |pūjitvā labhate puṇyaṃ tatsarvam idaṃ sūtraṃ paṭhanād iha || 54.22 ||yāvanti kecil loke 'smin kṣetrakoṭi-m-acintakāḥ |tāvanti paramāṇvākhyāṃ buddhānāṃ pūjayet sadā || 54.23 ||vividhā • annapānaiś ca glānapratyayabheṣajaiḥ |vividhāsanaśayyāsu dadyuḥ sarvataḥ sadā || 54.24 ||cīvarair vividhaiś cāpi cūrṇacīvarabhūṣaṇaiḥ |chatropānahapaṭaiḥ sugandhamālyavilepanaiḥ || 54.25 || {V517}dhūpanaṃ vividhair vāpi dīpaiś cāpi samantataḥ |tat puṇyaṃ prāpnuyāj jantur dhāraṇād vācanād idam || 54.26 ||pratyekabuddhā ye loke śrāvakā sumaharddhikaḥ |bodhisattvā mahātmāno daśabhūmisthitā parāḥ || 54.27 ||tatpramāṇād bhavet sarve teṣāṃ pūjāṃ tathaiva ca |tat puṇyaṃ prāpnuyān martya yasya pustakaṃ gataṃ kare || 54.28 || {S660}yāvanti loke kathitā lokadhātusamāśritā |sarvasattvā samākhyātās te sarve vigatajvarāḥ || 54.29 ||teṣāṃ ca pūjāṃ satkṛtya kaścij jantuḥ punaḥ punaḥ |tat puṇyaṃ prāpnuyād dhīmān pūjitvā dharmaparam imam || 54.30 ||na śakyaṃ kalpakoṭyais te ratnair jinavaraiḥ sadā |pūjayel lokanāthānāṃ dharmakośa imaṃ varam || 54.31 ||cintāmaṇi ca ratnārtham imaṃ dharmavaraṃ bhavet |paṭhanād dhāraṇān mantrā kalpe 'smin mañjubhāṇite || 54.32 ||bhavet kāmaduhaṃ tasya mahābhogārthasampadaḥ |akhinnamanaso bhūtvā yo • imān sādhayet bhuvi || 54.33 ||mantrān tattvārthaneyārthaṃ saphalā munibhāṣitā |kriyākālasamāyogāt sādhayed vidyadharāṃ bhuvi || 54.34 ||tasya sarvadiśā khyātā prapūrṇā ratnasampadaḥ |saphalā gatimāhātmyā caritā sādhuvarṇitā || 54.35 ||yo 'smān kalpavarān hy ekaṃ mantraṃ dhārayen nṛpa |saphalā rājasampatti dīrgham āyuṣyasampadām || 54.36 ||vividhā bhogacaryā vā prāpnuyān nṛpavaro parām |na cāsya hanyate śastrair na viṣaiḥ sthāvarajaṅgamaiḥ || 54.37 ||paravidyākṛtaiś cāpi mantraṃ vetāḍasādhanam |dūṣitair vasudhāloke parakṛtyaparāyaṇe || 54.38 ||na hutāśanabhayaṃ tasya nā vairagrahāparaiḥ |kāyaṃ na hanyate tasya nṛpater vā jantuno 'pi vā || 54.39 ||ya imaṃ sūtravarāgraṃ tu dhārayed vācayet tathā |rājā ca kṛtaṃ yo mūrdhnāṃ saṅgrāme samupasthite || 54.40 ||chatraṃ śirasi-m-āvedya namaskuryāt punaḥ punaḥ |na tasya dasyavo hanyur nānāśastrasamudyatām || 54.41 || {S661} {V518}hastiskandhasamārūḍhaṃ kumārākārasambhavam |mayūrāsanasustaṃ saṅgrāme • avatārayet || 54.42 ||dṛṣṭvā taṃ vidviṣaḥ sarve nivarteyus pare janāḥ |bālarūpaṃ tathā divyakumārālaṅkārabhūṣitam || 54.43 ||sauvarṇaṃ rājataṃ vāpi-r-āgatya dhvajayūpakam |āropya dhvajapatākeṣu sunyastaṃ susamāhitam || 54.44 ||saṅgrāmaṃ ripusaṅkīrṇaṃ nānāśāstrasamudyatam |yudhi prāptaṃ samastaṃ vai tasmin kāle 'vatārayet || 54.45 ||naśyante dṛṣṭamātraṃ vai muhyante vā samantataḥ |mānuṣāmānuṣāś cāpi nṛpāś cāpi sureśvarāḥ || 54.46 ||siddhavidyādharāś cāpi mantratantrasamāśritāḥ |rākṣasā sattvavanto 'pi kaṭapūtanāmātarā || 54.47 ||kravyādā vividhāś cāpi yakṣakūṣmāṇḍapūtanā |na śakyante dṛṣṭamātraṃ vai dhvajam ucchritasaṃsthitam || 54.48 ||kumāraṃ viśvakarmāṇam anekākārarūpiṇam |mañjughoṣaṃ mahātmānaṃ daśabhūmyādhipatiṃ patim || 54.49 ||mahārājā kṣatriyo loke bhūpālo bhūnivāsinaḥ |śrāddho 'vimati sandehavigato dharmavatsalaḥ || 54.50 ||utpādya saugatīṃ śraddhāṃ karuṇāviṣṭamānasām |prakramuḥ sandhikāmo vai kriyām etām ihoditām || 54.51 ||nirdiṣṭaṃ pravacane hy etā dharmadhātugatair jinaiḥ |kalpaṃ prayogaṃ mantrāṇāṃ tantrayuktimabhūtale || 54.52 ||asaṅkhyair jinavaraiḥ pūrvaṃ dharmadhātusamāśritaiḥ |kathitaṃ dharmakośaṃ tu mānuṣā tu bhūtale || 54.53 ||devāsure purā yuddhe vartamāne bhayāvahe |tadā puro hy āsīt hatasainyo 'tha vidviṣaiḥ || 54.54 || {S662}ekākinas tadāsattvo virathaś caiva mahītale |muniśreṣṭhe tadā pṛcchet kāśyapaṃ taṃ jinottamam || 54.55 ||kiṃ kartavyam iti vākyam ājahāra śacīpatiḥ |nirjito 'surair ghorair aham atra samāśritaḥ || 54.56 ||evam uktvā maghavān śatakratur divaukasaḥ |praṇamya śirasā mūrdhni pādayor munivare tadā || 54.57 || {V519}niṣaseduḥ purā hy āsīt kauśiko 'tha sahasradṛk |evam ukto muniśreṣṭhaḥ kāśyapo brāhmaṇa abhūt || 54.58 ||ājahāra tadā vāṇiṃ kalaviṅkarutasvanām |pūrvaṃ jinavarair gītaṃ kumāro viśvasambhavaḥ || 54.59 ||mañjuśrī mahātmāsau durlabho lakṣa-m-ūrjitaḥ |bhūtakoṭisamākhyāto gambhīrārthadeśikaḥ || 54.60 ||niḥprapañcaṃ nirākāraṃ niḥsvabhāvam anālayam |dharmādideśa sattvebhyas tat smariṣva sureśvaraḥ || 54.61 ||tatas tena smartaḥ sa smṛtas tattvagato tataḥ |āgatas tatkṣaṇāt tatra kumāro viśvarūpiṇaḥ |yatra sau bhagavān tasthuḥ maghavāṃś caiva sureśvara || 54.62 ||āgatā bhāṣate mantrāṃ vanditvā jinavaraṃ tadā |praṇamya jinavarāṃ sarvāṃ kāśyapaṃ ca mahādyutim |imā mantrām abhāṣeta labdhvānujñāṃ mune tadā || 54.63 ||ap54.64namaḥ sarvabuddhabodhisattvebhyo 'pratihataśāsanebhyaḥ | oṁ hana hana sarvabhayān sādayotsādaya trāsaya moṭaya chinda bhinda jvala jvala huṁ huṁ phaṭ phaṭ svāhā || 54.64 ||
ap54.65samanantarabhāṣiteyaṃ mantrā kumarabhūtena mañjuśriyeṇa bodhisattvena mahāsattvena | iyaṃ mahāpṛthivī ṣaḍvikāraṃ prakampitā saśailasāgaraparyantā sarvāṃś ca buddhāṃ bhagavatāṃ kṣetrānantāparyantā salokadhātudiśaparyantām | sarvaiś ca buddhair bhagavadbhir adhiṣṭhitāni ca • imāni mantrapadāni || 54.65 || {S663}
ap54.66atha śakro devānām indraḥ vigatabhayaromakarṣaḥ • āścaryādbhutaprāptaḥ • utphullanayanaḥ • utthāyāsanād bhagavataḥ pādayor nipatya triḥ pradakṣiṇīkṛtya ca mañjuśriyaṃ kumarabhūtaṃ sammukhaṃ dṛṣṭvā tāni ca mantrapadāṃ gṛhya manasīkṛtya ca punar eva syandanam adhiruhya yena te 'surāḥ prādravitaḥ | sarve 'surā yena pātālaṃ mahāsamudrāśrayādharapuraṃ svakaṃ tenābhimukhāḥ prayayuḥ | hatavidhvastamānasaḥ sainyabhayākulitavihvalaniṣaṇṇavadanadarpaḥ vigataśastrā dṛṣṭā taṃ sureśvaraṃ jvalantam iva pāvakaṃ nirvartya svālayaṃ gatā abhūt || 54.66 ||
ap54.67atha śakro devānām indro devān trāyastriṃśān āmantrayate sma | mā bhaiṣṭata mārṣā mā bhaiṣṭata | buddhānubhāvena vayam asurān nirjitavantaḥ | gacchāmaḥ svapuram | āgacchantu bhavantaḥ krīḍatha ramatha paricārayatha svaṃ svaṃ bhavanavaraṃ gatvā svālayaṃ ca | itas te devā hṛṣṭamanasaḥ punar eva nivartya svālayaṃ gatāḥ || 54.67 ||
ap54.68atha śakrasya devānām indrasyaitad abhavat | yanv ahaṃ taṃ kumārarūpiṇaṃ bimbākāraṃ kṛtvā dhvajāgre sthāpayeyaṃ tato me nāsurabhayaṃ bhaved iti | atha śakro devānām indro mahatā maṇiratnaṃ dyotigarbhaprabhodyotanaṃ nāma gṛhītvā kumārākārapratibimbaṃ kārayitvā • upari prāsādasya mūrdhani {V520} sudharmāyāṃ devasabhāyāṃ sudarśanasya mahānagarasya madhye taṃ dhvajocchritasuvinyastaṃ kṛtvā sthāpayām āsa || 54.68 ||
ap54.69tatas te asurā prahrādavemacitriprabhṛtayaḥ pātālaṃ nordhvagacchanti na ca tān devān abhidravante na ca śekuḥ • ṛddhivikurvāṇaṃ raṇābhimukhaṃ vā gantum | evam anekāni varṣakoṭinayutaśatasahasrāṇi mānuṣikayā gaṇanayā | na cāsurabhayaṃ syād iti || 54.69 ||
ap54.70evam idam aparimitaguṇānuśaṃsaṃ saṅkīrtitam āyurārogyavardhanaṃ buddhair bhagavadbhir bodhisattvair mahāsattvaiḥ kathitaṃ purā | evam idam aparimitānuśaṃsaguṇavistaram anantāparyantaṃ purād iti || 54.70 ||
ap54.71aparimāṇaṃ cāpuṇyaprasavanaṃ mahānarakopapattitiryakpretayamalokajanmakutsanatām upaiti yo • imaṃ dharmaparyāyam apavadate vikalpeta vākramati grastacitto vāvavadeyur na buddhavacaneti {S664} vāvadeyuḥ na mantrā na cauṣadhayo bodhisattvānāṃ pi teṣāṃ māhātmyavistaram ṛddhivikurvaṇaṃ vā nāpi vikalpavistaram anāryair bhāṣitam iti kṛtvā • utsṛjya tyajante • avagacchanti na śaknuvanti vā śrotum | tasmāt sthānād apakramante mahān teṣām apuṇyaṃ bhaviṣyatīty āha || 54.71 ||
ye narā mūḍhacittā vai pratikṣepsyanti varam imam |dharmaṃ munivarair gītaṃ jinaputraiś ca dhīmataiḥ || 54.72 ||tena te narakaṃ yānti sotsedhaṃ satiryagam |kālasūtram atha sañjīvaṃ kṣuradhārāṃ gūthamṛttikām || 54.73 ||kuṇapaṃ kṣāranadī grāhya jvaradhārā punas tataḥ |asipattravanaṃ ghoram avavaṃ hahavaṃ tathā || 54.74 ||aṭaṭaṃ lokavikhyātaṃ narakaṃ pāpakarmiṇām |gacchante janā tatra ye narā dharmadūṣakāḥ || 54.75 ||avīcir nāma tad ghoraṃ prakhyātaṃ lokaviśrutam |kutsitamayaḥ prākāravikṣiptam āvāsaṃ pāpakarmiṇām || 54.76 ||pacyante te janās tasmin yo dharmaṃ lopayed imam |avīciparyantasarvāṃ tāṃ sotsedhāṃ samūlajām || 54.77 ||anantāṃ narakabhūmyantāṃ gate 'sau vimatiḥ sadā |pratikṣeptā dharmasarvasvaṃ idaṃ sūtraṃ savistaram || 54.78 ||loke kutsatāṃ yānti + + + + + + |avīcyantāṃ narakān yānti vivaśair vaśagatas tadā || 54.79 ||yo hi saṃsūtrakalpākhyaṃ mantratantrabhūṣitam |siddhicitraśatālambya bhūtakoṭim anāvṛtam || 54.80 ||śarīraṃ dharmadhātvartham anālambanabhāvanam |vistaraṃ paṭalotkṛṣṭaṃ sakalpaṃ kalpavistaram || 54.81 || {V521}mañjughoṣasuvinyastaṃ samyac chrīmatipūjitam |mūlakalpam analpaṃ vai kathitaṃ bahuvistaram || 54.82 || {S665}śāśvatocchedamadhyāntam ubhayārthāntavarjitam |saṅkramaṃ kramanirdiṣṭaṃ mantramūrtisamucchritam || 54.83 ||analānilam ākāśaṃ śūnyatvasubhāṣitam |pratikṣeptā sadā gacched adho adhagatāṃ tadā || 54.84 ||visaṅkhyeyārjitaṃ puṇyaṃ kalpair bahuvidhais tadā |samudānīya tathā bodhiṃ mayāgravare jine || 54.85 ||bhāṣitaṃ mantratantrārthaṃ gatideśaniratyayam |mūlakalpaṃ pavitraṃ vai maṅgalyam aghanāśanam || 54.86 ||paṭalaṃ savisaraṃ proktaṃ nīlasūtrāntaśobhanam |nṛpatīnāṃ guṇamāhātmyaṃ kāladeśaprayogitam || 54.87 ||saddharmaṃ jinaputrāṇāṃ bhūtale 'tha nṛjanminām |kathitaṃ lokamukhyānāṃ munisaptamataṃ jine || 54.88 ||bhāṣitaḥ kalpavistāraḥ śrīsampatsamabhivardhanaḥ |samūlo visarapaṭalākhyo mantratantrasamarcitaḥ || 54.89 ||yo hīmaṃ sūtravaraṃ mukhyaṃ dharmakośaṃ jinorjitam |pratikṣeptāro bhuvi martyāṃ vā • avīcau narakāntakau |mahākalpān anekān vai copavarṇitān || 54.90 ||yadā kāle tu martyāḥ kadācit karhacid bhavet |daridro vyādhito mūrkho jāyate mlecchajanminaḥ |loke kutsatāṃ yāti kuṣṭhavyādhī bhavet || 54.91 ||durgandho 'tha bībhatsa vyaṅgo • andha eva saḥ |bhīmarūpī sadārūpī sadā rūkṣaḥ pretavad dṛśyate bhuvi || 54.92 ||kuśalo dīnacittaś ca kunakhaḥ kutsitas tathā |kṛmibhir bhakṣyamāṇas tu dadrukaṇḍūsamākulaḥ || 54.93 ||avāsī paramabībhatsaḥ • asambhāṣī copapadyate |kramati grastacittas tu kumatir yāti punaḥ punaḥ || 54.94 || {S666}pratikṣeptā ca dharmakośas tu jinānāṃ dhātupūjitam |bahuduḥkhasamāyāsāmbandhumitra-m-anāthavān || 54.95 ||jāyate bahudhā martyaḥ śokaduḥkhasamākulaḥ |yatra tatra gatir yāti kumatis tatra jāyate |pratikṣeptād idaṃ sūtraṃ tatra tatropapadyate || iti || 54.96 || {V522}ap54.97atha mañjuśrīḥ kumarabhūto bodhisattvo mahāsattva utthāyāsanād ekāṃśam uttarāsaṅgaṃ kṛtvā dakṣiṇaṃ jānumaṇḍalaṃ pṛthivyāṃ pratiṣṭhāpya kṛtāñjalipuṭaḥ • utphullanayanaḥ • animiṣanayanaḥ sarvāṃs tān śuddhāvāsabhavanastān devaputrān anekāṃś ca bhūtasaṅghāṃ sannipatitāṃ dharmaśravaṇāya viditvaivaṃ śākyamuniṃ bhagavantam etam āhuḥ || 54.97 ||
ap54.98āścaryaṃ bhagavan yāvat paramaṃ subhāṣito 'yaṃ dharmaparyāyaḥ | tad bhagavan bhaviṣyaty anāgate 'dhvani | sattvā viṣamalobhābhībhūtāḥ sattvāḥ pañcakaṣāyodriktamanaso 'śrāddhāḥ kuhakāḥ khaṭukāḥ kuśīlās te mantrāṇāṃ gatimāhātmyapūjitakāladeśaniyamaṃ mantracaryāhomajapaniyamakalpavisarān na śraddhāsyanti | abuddhavacanam iti kṛtvā pratikṣepsyante | kliṣṭamanaso bhūtvā kālaṃ kariṣyanti | te duḥkhāṃ tīvrāṃ kharāṃ kaṭukāṃ vedanāṃ vedayiṣyanti | mahānarakopapannāś ca te bhaviṣyanti | teṣāṃ bhagavan duḥkhitānāṃ sattvānāṃ kathaṃ pratipattavyam mahākāruṇikāś ca buddhā bhagavantaḥ || 54.98 ||
ap54.99atha bhagavān śākyamunir mañjuśriyaṃ kumarabhūtaṃ mūrdhni parāmṛśyāmantrayate sma | sādhu sādhu khalu punas tvaṃ mañjuśrīr yas tvaṃ sarvasattvānām arthe hitāya pratipannaḥ | sādhu punas tvaṃ mañjuśrīḥ yas tvaṃ tathāgatam etam arthaṃ praśnasi | tena hi tvaṃ mañjuśrīḥ śṛṇu sādhu ca suṣṭhu ca manasi kuru | bhāṣiṣye 'haṃ te sarvasattvānām arthāya hitāya sukhāya lokānukampāyai devamanuṣyāṇāṃ ca sarvamantracaryānupraviṣṭabodhimārganiyuñjānadharmadhātuparamamūrtyopāśrayalilipsūnāṃ maraṇakālasamaye ca smartavyo 'yaṃ vidyārājā paramarahasyaṃ kumāra tvadīyamūlakalpapaṭalavisare | katamaṃ ca tat || 54.99 || {S667}
ap54.100namaḥ sarvatathāgatebhyo 'rhadbhyaḥ samyaksambuddhebhyaḥ | oṁ kumārarūpiṇe viśvasambhava • āgacchāgaccha | lahu lahu bhrūṃ bhrūṃ hūṃ hūṃ jinajit • mañjuśrīye suśriye tāraya māṃ sarvaduḥkhebhyaḥ phaṭ phaṭ śamaya śamaya | amṛtodbhavodbhavapāpaṃ me nāśaya svāhā || 54.100 ||
ap54.101eṣa mañjuśrīs tvadīyaṃ paramahṛdayaṃ sarvaśāntikaraṃ sarvapāpakṣayaṃ sarvaduḥkhapramocanam āyurārogyaiśvaryaparamasaubhāgyavākyasañjananaṃ sarvavidyārājasattejanaṃ ca | samanantarabhāṣite śākyamuninā buddhena bhagavatā • iyaṃ mahāpṛthivī saśailasāgarasattvabhājanasannicayaparyantā ṣaḍvikāraṃ prakampati bhābhūt | sarvāś ca gatayaḥ pretatiryagyamalokasarvasattvaduḥkhāni pratipraśrabdhāni || 54.101 ||
ap54.102ayaṃ ca vidyārājā mañjuśrīr manasi kartavyaḥ • na ca tasmin samaye saddharmapratikṣepeṇa cittaṃ bhaveyuḥ | na ca mārāḥ pāpīyāṃsaḥ • avatāraṃ lapsante | sarvavighnavināyakāś cāpakramante | evaṃ ca cittam utpādayitavyam kiṃ mayā śakyaṃ buddhānāṃ bhagavatām acintyabuddhā bodhidharmā cintayituṃ vā pratikṣeptuṃ vā buddhā bhagavanto jñāsyantīti || 54.102 ||
ap54.103āryamañjuśrīmūlakalpād bodhisattvapiṭakāvaṃtaṃsakān mahāyānavaipulyasūtrāc catuḥpañcāśo 'nuśaṃsāvigarhaṇaprabhāvapaṭalavisaraḥ parisamāpta iti || {V523}
parisamāptaṃ ca yathālabdham āryamañjuśriyasya kalpam iti ||