Chapter A25
atha bhagavatī āha |aparaṃ śrotum icchāmi prajñāpāramitodayam |prasādaṃ kuru me nātha, saṃkṣiptaṃ nātivistaram ||atha bhagavān āha |athātaḥ sampravakṣyāmi prajñāpāramitodayam |sattvaparyaṅkinīṃ devīṃ ṣoḍaśābdavapuṣmatīm ||nīlavarṇāṃ mahābhāgāṃ akṣobhyeṇa ca mudritām |raktapadmodyatāṃ savye līlayā vāmahastake ||sthitaṃ vai kāmaśāstraṃ tu padmacandroparisthitām |pīnonnatakucāṃ dṛptāṃ viśālākṣīṃ priyaṃvadām ||sahajāca[la]samādhistho devīm etām tu bhāvayet |hūṁkārajñānasambhūtāṃ viśvavajrīṃ tu yoginīm ||bhāvayet kroḍato yogī dhruvaṃ siddhim avāpnute |athavā bhāvayec chvetāṃ vāṇīṃ dhīḥkārasambhavām ||mudritāṃ śāśvatenaiva pītāṃ vajradhātvīśvarīm |ratneśamudritāṃ vaṁjāṃ raktāṃ vā kurukullikām ||amitābhamudritāṃ devīṃ hrīṁkārajñānasambhavām |tārāṃ vā śyāmavarṇāṃ ca tāṁkārajñānasambhavām ||amoghamudritāṃ dhyāyāt pūrvarūpeṇa mānavaḥ |sattvaparyaṅkasaṃsthas tu saumyarūpeṇa saṃsthitaḥ ||khaḍgapāśadharaḥ śrīmān āliṅgābhinayaḥ kṛtī |svakulīṃ parakulīṃ vā kanyāṃ gṛhya prabhāvayet ||anena sidhyate yogī mudrayā naiva saṃśāyaḥ |athavā pratikṛtīṃ kṛtvā sādhayen mṛtsnādisaṃskṛtām ||sahajacaṇḍasamādhistho japed ekāgramānasaḥ ||ap25.13tatrāyaṃ japyamantraḥ | oṁ vivajri āgaccha āgaccha hūṁ svāhā | oṁ vajrasarasvatī āgaccha āgaccha dhīḥ svāhā | oṁ vajradhātvīśvarī āgaccha āgaccha vaṁ svāhā | oṁ kurukulle āgaccha āgaccha hrīṁ svāhā | oṁ tāre āgaccha āgaccha tāṁ svāhā ||
athātaḥ sampravakṣyāmi ekavīraṃ tu maṇḍalam |caturasraṃ caturdvāraṃ catustoraṇamaṇḍitam ||pītavarṇaṃ tu kartavyaṃ madhye padmaṃ caturdalam |tasya cāgnau dalaṃ śvetaṃ nairṛte raktasaṃnibham ||vāyavye pītavarṇaṃ tu śyāmam aiśānakoṇake |madhye vai kṛṣṇavarṇaṃ tu tatrācalaṃ prakalpayet ||sūryasthaṃ vāthavā śvetaṃ pītaṃ vā raktam eva vā |śyāmaṃ vā pañcabhir buddhair ekarūpaṃ vicintayet ||locanām agnikoṇe ca candrāśokavidhāriṇīm |vāmadakṣiṇakarābhyāṃ śaraccandrakaraprabhām ||nairṛte pāṇḍarādevīṃ dhanurbāṇadharāṃ parām |raktāṃ vāyavyakoṇe tu māmakīṃ pītasaṃnibhām ||ghaṭadhānyaśikhāhastāṃ śyāmām aiśānakoṇake |tāriṇīṃ varadāṃ savye vāme nīlotpaladhāriṇīm ||etāś candrāsanāḥ sarvā ardhaparyaṅkasaṃsthitāḥ |rāgavajrīṃ nyaset pūrvadvāre śakrakṛtāsanām ||khaḍgakarparadharāṃ raktāṃ dveṣavajrāṃ tu dakṣiṇe |kartritarjanīkarāṃ nīlāṃ yamena kṛtaviṣṭarām ||paścime mānavajrāṃ tu parśuvajradharākulīm |mayūrapicchavastrāṃ tu varuṇasthāṃ nyaset ||sūryāsanās tv amī pratyālīḍhapadāḥ sarvāḥ kruddhā muktamūrdhajāḥ ||catvāro hi ghaṭāḥ koṇe kartavyāḥ pītasaṃnibhāḥ |asya bhāvanamātreṇa yoginyaṣṭasamanvitaḥ ||trailokyasthitaḥ strīṇāṃ sa bhartā parameśvaraḥ ||athānyāṃ sampravakṣyāmi caṇḍamahāroṣaṇabhāvanāṃ |viśvapadmodare devaṃ kalpayec caṇḍaroṣaṇam |rāmadevaṃ bhave 'gnau raktavarṇaṃ tu nairṛte ||pītaṃ vai kāmadevaṃ tu śyāmaṃ māhillanāmakam |vāyavye kṛṣṇavarṇakokilāsurasaṃjñakam ||kartrikarparakarāś caite saṃsthitālīḍhapādataḥ |bhagavataḥ paścime devī sthitā vai parṇaśāvarī ||asyaiva dhyānayogena dagdhamatsādipūjayā bandhayet sarvadevān ||pītayā prajñayā yuktaṃ vāme ca śvetapadmayā |nīlaṃ vai caṇḍaroṣaṃ tu raktayā kṛṣṇayāthavā ||sidhyate tatkṣaṇaṃ yogī bhāvanāpariniṣṭhitaḥ |evaṃ śvetācalādīṃś ca bhāvayed gāḍhayatnataḥ ||bījenāpi vinā dhyāyād ekacittasamāhitaḥ |piban bhuñjan svapan tiṣṭhan gacchañ caṅkramann api ||sarvāvasthāsthito yogī bhāvayed devatākṛtim |athavā kevalaṃ saukhyaṃ yoginīdvaṃdva nanditam ||tāvad vibhāvayed gāḍhaṃ yāvat sphuṭatāṃ vrajeta |gate tu prasphuṭe yogī mahāmudreṇa sidhyati ||ity ekallavīrākhye śrīcaṇḍamahāroṣaṇatantre devatā sādhanapaṭalaḥ pañcaviṃśatitamaḥ ||idam avocad bhagavān śrīvajrasattvas te ca yogiyoginīgaṇā bhagavato bhāṣitam abhyanandann iti ||ity ekallavīranāmacaṇḍamahāroṣaṇatantraṃ samāptam ||ye dharmā hetuprabhavā hetuṃ teṣāṃ tathāgato hy avadat | teṣāṃ ca yo nirodha evaṃvādī mahāśramaṇaḥ ||